Katër persona janë lënduar si pasojë e një aksidenti mes një autobusi dhe tri veturave në magjistralen Ferizaj-Prishtinë, në fshatin Prelez i Muhaxherëve të Ferizajt.

Lajmin për Arbresh.info e ka konfirmuar Kanun Veseli, zëdhënës i Policisë Rajonale të Ferizajt i cili  tha se të lënduarit janë transportuar për trajtim mjekësor në Qendrën Emergjente në Ferizaj nga ekipet e autoambulancës.

Të lënduarit më pas janë liruar.

Ai njoftoi se ekipet e policisë nga Njësia e Komunikacionit Rrugor kanë mbërritur menjëherë në vendngjarje, ndërsa hetuesit kanë kryer ekzaminimin e plotë të vendit të ngjarjes.

“Në aksident janë përfshirë një autobus dhe tri vetura, të gjitha me targa vendore. Në vendngjarje menjëherë kanë dalë ekipet e policisë nga Njësia e Komunikacionit Rrugor, ndërsa hetuesit e aksidenteve kanë kryer ekzaminimin e plotë të vendit të ngjarjes,” tha Veseli, duke shtuar se automjetet e përfshira kanë pësuar dëme materiale. Për të gjitha veprimet e ndërmarra, është njoftuar prokurori i shtetit.”, tha ai.

Hetimet për rrethanat dhe shkaqet e aksidentit po vazhdojnë./Arbresh.info/